Alison的故事

Q：簡單介紹下自己

A：大家好我叫Alison，加入咗同路舍八個月左右，暫時處理過約18個個案。放工我中意做運動，打巴西柔術。

 

Q：點解想做個案工作員？

A：講起上嚟有啲老土，但就係想做一份有意義嘅工作。我本身大學讀心理學，意識到社會生活壓力好大，其實人人都需要輔導，大家都有各自嘅煩惱同痛苦。做個案工作員就正正係每日都可以為人嘅生命帶來一點改變。

 

Q: 遇過最難忘嘅突發狀況？

A: 我其中一位個案，係一個好開朗好多野講好外向嘅人。有一排我地發現佢把聲唔同咗。佢去睇醫生淨係話喉嚨有個腫瘤，當時仲未知係良性定惡性。 

第二日我陪佢一齊去醫院，當時有四位醫生，同埋一位醫務社工坐喺度圍住我地。醫生話原來已經係癌症第三期，仲話當聲帶嘅癌細胞發大壓住喉嚨，就有機會令佢窒息，會有即時生命危險。唯一嘅解決方法係做緊急手術。你明唔明嗰種掙扎？一係隨時會死，一係以後都可能無法講野。

一個外向嘅人失去發聲嘅權利，係點樣嘅感受？

生死關頭壓力真係好大。即使我唔係個病人，都一樣感受到，而當時佢非常抗拒做手術。最後我冷靜落嚟，同個案分析成件事，我話無論佢做咩決定，我都會100%支持佢。不過如果佢決定放棄手術，我地需要即刻訂立遺囑，處理人生最後階段嘅事情。其實我都好擔心佢嘅安危，但我尊重佢嘅選擇。雖然佢嗰日話要時間去考慮，但結果第二日佢就同我講，會接受手術。

呢個係我遇到過最突發嘅狀況，一齊同佢面對死亡。生命嘅一切都嚟得好突然，殺人一個措手不及。件事雖然係好難跨過，但我好感恩可以陪伴佢行呢段路。

 

Q：最感動嘅事？

A：每一位client願意同我分享佢嘅故事，我都好感恩。要講出自己嘅過去同埋創傷從來唔係一件容易嘅事。當佢地講，就代表信任我，我真係覺得好感動。

 

Q：由服務使用者身上獲得嘅啓發？

A：我有一位個案已經喺機構接受咗超過4年嘅服務，中間都有幾次再露宿嘅情況。當我啱啱接手佢嘅個案時，有好多同事同我講呢個會係一個挑戰。雖然係咁，喺好多節嘅輔導之後，我哋一齊反思佢嘅優點和缺點，我都鼓勵佢要改變，同埋要為佢嘅未來而奮鬥。半年後，他已經保住份工3個月喇！仲升咗職！呢件事展示到只要我地有毅力同埋決心，係克服任何挑戰，連脫離露宿都可以做到。

 

Q: 無力感最重嘅時刻？

A: 應該係睇住個案嘅精神狀況越來越差嘅時候。當我好盡力為個案去服務，扶持佢走過唔同階段，但望住佢一次又一次犯錯，又唔想同我溝通，我就會覺得好無力。好似之前花過嘅努力都係枉費。幸運地我有一班好好嘅同事，佢哋好支持我，俾好多有用嘅建議同鼓勵我，令我有勇氣繼續落去。

 

Q: 同以前相比，對無家群體嘅睇法有冇唔同？

A: 有，我回想起一件細個嗰陣嘅小事。嗰陣好似都係9歲左右。當時我見到有一個人瞓咗喺路邊，我問媽咪點解唔可以帶佢返去，俾佢同我地一齊住，咁佢咪唔使咁慘囉。佢可以有個地方住，搵工，儲錢咁咪得囉！

媽媽只係笑笑。而我一直都唔知道點解媽咪冇繼續解釋落去。

大個到我自己做咗個案工作員，我發現對無家者嚟講，原來一個住所根本唔足夠。每一個無家者所面對嘅問題都好複雜，係需要好長時間去處理同復原。房屋只係其中一項援助，但仲有好多野要跟進，成個過程真係好困難。

 

Q：想同社會大眾講嘅説話？

A：唔好低估説話嘅影響力。『癲』，『廢』呢啲字，只會令貼喺佢地身上嘅標籤更難以去除。